యాద‌వుల‌ను.. యాద‌వుడే ముంచుడాయే..

• గొర్రెల ప‌థ‌కంలో ఓ మాజీ మంత్రి భారీ కుంభకోణం
• సుమారు వేల కోట్ల ప్రజాధనం స్వాహా
• మంత్రి ప‌ర్య‌వేక్ష‌ణ‌లో ఓఎస్డీ క‌ళ్యాణ్ కీల‌క పాత్ర‌
• మంత్రి ప‌ర్య‌వేక్ష‌ణ‌లో జ‌రిగింద‌ని అనుమానాలు
• ఈడీ, ఏసీబీ, సీఏజీ సంయుక్త ద‌ర్యాప్తులో వెల్ల‌డి!
• ఓ యువ‌కిర‌ణానికి ఎన్నిక‌ల నిధులు స‌మ‌కూర్చింది ఎవ‌రు..?
• ప్ర‌భుత్వ అధికారి అవినీతికి పాల్ప‌డితే రిమూవ‌ల్ ఆఫ్ ది స‌ర్వీస్
• అదే నాయ‌కుడు అవినీతికి పాల్ప‌డితే చ‌ర్య‌లు ఎక్క‌డ‌..?

సొంత ప్రయోజనాల కోసం స్వార్థపరులైన నాయకులు ఏ స్థాయికైనా దిగజారతారని, అందుకు నిదర్శనమే బీసీ సామాజిక వర్గానికి చెందిన ఓ మాజీ మంత్రి వ్యవహరించిన తీరు. ఆర్థికంగా వెనుకబడిన బీసీ వర్గాల అభ్యున్నతి కోసం గ‌త బీఆర్ఎస్‌ ప్రభుత్వం గొర్రెల పంపిణీ పథకాన్ని ప్రవేశపెట్టింది. కానీ ఆ మాజీ మంత్రి స్వప్రయోజనాల కోసం ఆ పథకాన్ని అవినీతిమయం చేసి, ఆ వర్గాలకు తీవ్ర అన్యాయం చేశారు. సొంతవారిని, ప్రజలను మోసం చేయడానికి వెనుకాడని నాయకుల స్వార్థపూరిత మనస్తత్వాన్ని ఇది స్పష్టం చేస్తుంది. ఇలాంటి చర్యలు సమాజంలో అసమానతలను పెంచి, ప్రజల విశ్వాసాన్ని దెబ్బతీస్తాయి. నీతి, నిజాయితీ లేని నాయకత్వం సమాజానికి ఎంత ప్రమాదకరమో ఈ ఉదంతం నిరూపిస్తుంది.

తెలంగాణ గొర్రెల పంపిణీ పథకం, గ్రామీణ ఆర్థిక వ్యవస్థను బలోపేతం చేయాలన్న ఉన్నత లక్ష్యంతో మొదలై, నేడు వేల కోట్ల రూపాయల ప్రజాధనాన్ని మింగిన ఒక దారుణమైన కుంభకోణంగా మారింది. నిరుపేద గొర్రెల కాపరుల జీవితాల్లో వెలుగు నింపాల్సిన ఈ పథకం, గత ప్రభుత్వంలోని కొందరు స్వార్థపరుల జేబులు నింపే సాధనంగా మారిందని స్పష్టమవుతోంది. ఈ వ్యవస్థీకృత నేరంలో ఉన్నతాధికారుల నుంచి మాజీ మంత్రి వరకు అందరూ భాగస్వాములయ్యారని దర్యాప్తు సంస్థల నివేదికలు నిగ్గుతేల్చాయి. ఇదంతా కేవలం కొద్దిమంది వ్యక్తుల అవినీతి కాదని, ఒక ప్రభుత్వ పథకాన్ని ఏ విధంగా దోపిడీకి వాడుకోవచ్చో తెలిపే ఒక పచ్చి నిజం. ఈ నిజాన్ని “ఆదాబ్ హైదరాబాద్ ” పూర్తి ఆధారాలతో జరిగిన అవినీతి భాగోతాన్ని, అధికారుల అనైతిక కార్యక్రమాలను పూర్తి ఆధారాలతో వెలుగులోకి తీసుకువ‌చ్చింది. అంతేకాకుండా ఈ వాస్తవాలను న్యాయస్థానం దృష్టికి కూడా తీసుకెళ్లడం జరిగింది. ఈ అవినీతి కుంభకోణంపై ఇప్పటికీ ఆదాబ్ హైదరాబాద్ న్యాయపోరాటం కొనసాగిస్తుంది.

ఎగతాళి చేస్తున్న ‘గొర్రెల పంపిణీ’ నాటకం:
ఈ పథకం అమలులో జరిగిన అక్రమాలు చూస్తే సామాన్య ప్రజలు ఆశ్చర్యపోవడం కాదు, నవ్వుకోవడం తప్ప వేరే గత్యంతరం లేదు. బైక్‌పై 126 గొర్రెలు, కారులో 168 గొర్రెలు రవాణా చేసినట్టు రికార్డుల్లో చూపించడం, అంబులెన్స్‌లు మరియు ఫైర్ ట్రక్కులలో గొర్రెలు తరలించినట్టు బిల్లులు సృష్టించడం వంటివి చూస్తే, అధికారులు ఈ పథకాన్ని ఎంత నిర్లక్ష్యంగా, అపహాస్యంగా అమలు చేశారో అర్థమవుతోంది. గొర్రెలు బతికున్నాయో, లేదో కూడా పట్టించుకోకుండా, చనిపోయిన లబ్ధిదారుల పేరుతో కూడా నిధులు కేటాయించడం ఈ కుంభకోణం ఎంత లోతుగా పాతుకుపోయిందో రుజువు చేస్తుంది. 14 నుంచి 36 నెలల తర్వాత కూడా యూనిట్లు మంజూరు చేయడం అనేది మానవీయతనే కాదు, ప్రభుత్వ యంత్రాంగంపై విశ్వాసాన్ని కూడా చంపేస్తుంది. ఈ దారుణాలన్నిటికీ ప్రణాళిక రచించిన అధికారులు మరియు దానిని పర్యవేక్షించాల్సిన బీఆర్ఎస్ ప్ర‌భుత్వంలోని ఓ మంత్రి బాధ్యత వహించరా?

మాజీ మంత్రిపై తీవ్ర విమర్శలు:
గొర్రెల పంపిణీ పథకానికి మంత్రిగా వ్యవహరించిన తలసాని శ్రీనివాస్ యాదవ్.. ఈ మొత్తం వ్యవహారంపై జవాబు చెప్పాల్సిన బాధ్యత ఉంది. తన శాఖలో వేల కోట్ల రూపాయల కుంభకోణం జరుగుతున్నప్పుడు ఆయన ఏం చేస్తున్నారు? ఆయన కళ్ళు మూసుకున్నారా? లేక ఈ దోపిడీలో భాగమయ్యారా? అనే ప్రశ్నలు ఇప్పుడు ప్రజల్లో తలెత్తుతున్నాయి. కేవలం పథకం ప్రారంభోత్సవాలకే పరిమితమై, ఆ తర్వాత దాని అమలులో జరిగిన అక్రమాలను పట్టించుకోకపోవడం ఆయన నిర్లక్ష్యానికి పరాకాష్ఠ. ఈడీ దర్యాప్తులో మాజీ మంత్రి ఓఎస్డీ (ఆఫీసర్ ఆన్ స్పెషల్ డ్యూటీ) జి. కల్యాణ్ కుమార్ క్రియాశీల పాత్ర పోషించారని వెల్లడైంది. ఓఎస్డీ స్థాయి అధికారి ప్రభుత్వ నిధులను మళ్లించగలిగాడంటే, దాని వెనుక మంత్రిగారి మౌన మద్దతు లేదా ప్రత్యక్ష ప్రమేయం ఎంత ఉందో ఊహించుకోవచ్చు. తన అత్యంత సన్నిహితుడు కుంభకోణంలో భాగమైనప్పుడు, మంత్రిగా ఆయన బాధ్యత నుండి ఎలా తప్పించుకోగలరు? ఈ కుంభకోణం తెలంగాణ ప్రజల ఆశలను వమ్ము చేసింది, ప్రభుత్వ పథకాలపై నమ్మకాన్ని తీవ్రంగా దెబ్బతీసింది. ఈ మోసానికి పాల్పడిన అధికారులతో పాటు, దీనికి కారకులైన అప్పటి మంత్రిపైనా కఠిన చర్యలు తీసుకోవాల్సిన అవసరం ఉంది. లేకపోతే, భవిష్యత్తులోనూ ఇలాంటి కుంభకోణాలు పునరావృతమవుతూనే ఉంటాయి.

రూ.:1000 కోట్ల కుంభకోణం…
ఆడిట్ నివేదిక ఎందుకు విఫలమైంది? ఆడిట్ అధికారులు ఏం చేశారు?
తెలంగాణ గొర్రెల పంపిణీ పథకంలో రూ. 1,000 కోట్ల కుంభకోణం జరిగినట్లు దర్యాప్తు సంస్థలు అంచనా వేస్తున్న నేపథ్యంలో, ఈ భారీ అవినీతిని ఎందుకు గుర్తించలేకపోయారని ఆడిట్ అధికారులపైన, ఆడిట్ వ్యవస్థపైన తీవ్రమైన ప్రశ్నలు తలెత్తుతున్నాయి. రూ. 2.1 కోట్ల చిన్న ఫిర్యాదుతో వెలుగులోకి వచ్చిన ఈ కుంభకోణం, ఏసీబీ, సీఏజీ, ఈడీల దర్యాప్తులో రూ. వెయ్యి కోట్లు దాటుతుందని తేలింది. ఈ భారీ అక్రమాలను ఆడిట్ అధికారులు ముందుగా గుర్తించడంలో విఫలమయ్యారా? లేక ఉద్దేశపూర్వకంగా విస్మరించారా?

ఆడిట్ అధికారుల వైఫల్యంపై విశ్లేషణ:
ఒక పథకంలో ప్రజాధనం సరైన మార్గంలో ఖర్చు అవుతుందా లేదా అని తనిఖీ చేయడం ఆడిట్ అధికారుల ప్రధాన బాధ్యత. కానీ, గొర్రెల పథకం విషయంలో వారు ఆ బాధ్యతను నిర్వర్తించడంలో ఘోరంగా విఫలమయ్యారు. ఈ కుంభకోణంలో బయటపడిన అక్రమాలు చాలా ప్రాథమికమైనవి, కనీస తనిఖీలతోనే వాటిని గుర్తించవచ్చు.

• చిన్న‌ లాజిక్‌ను కూడా గుర్తించ‌ని అసమ‌ర్థులు : ఒక బైక్‌పై 126 గొర్రెలు రవాణా చేసినట్లు బిల్లులు సృష్టించడాన్ని ఒక సాధారణ అధికారి కూడా గుర్తించగలడు. కానీ, ఆడిట్ అధికారులు ఈ స్పష్టమైన లోపాలను కూడా పట్టించుకోకుండా వాటికి ఆమోదం తెలిపారు. ఇది వారి నిర్లక్ష్యానికి నిదర్శనం.
• నకిలీ రవాణా బిల్లుల గుర్తింపులో వైఫల్యం: ఫైర్ ట్రక్కులు, అంబులెన్స్‌లు వంటి నాన్-గూడ్స్ వాహనాలను రవాణాకు ఉపయోగించినట్లు చూపించడం అనేది పత్రాల పరిశీలన సమయంలో స్పష్టంగా కనిపించే లోపం. ఈ రకమైన ప్రాథమిక తనిఖీ కూడా ఎందుకు జరగలేదో ఆడిట్ అధికారులు జవాబు చెప్పాలి.
• నకిలీ లబ్ధిదారుల గుర్తింపులో లోపం: మరణించిన వ్యక్తుల పేర్లతో గొర్రెలు కేటాయించడం వంటి మోసాలను నివారించడానికి లబ్ధిదారుల జాబితాలను పౌర రికార్డులతో సరిపోల్చడం వంటి ప్రాథమిక ప్రక్రియలు అవసరం. ఈ ప్రక్రియలు సరిగా అమలు కాలేదా? లేక వాటిని ఉద్దేశపూర్వకంగా విస్మరించారా?
• డమ్మీ ఖాతాలు మరియు నిధుల మళ్లింపు: ఈడీ దర్యాప్తులో బయటపడిన 200కు పైగా డమ్మీ బ్యాంక్ ఖాతాలను, వాటి లావాదేవీలను ఆడిట్ అధికారులు ఎందుకు పర్యవేక్షించలేకపోయారు? లబ్ధిదారులకు వెళ్ళాల్సిన నిధులు బినామీ ఖాతాల్లోకి మళ్లించబడినప్పుడు, ఈ అసాధారణ లావాదేవీలు ఆడిట్ అధికారుల దృష్టికి ఎందుకు రాలేదు?

ఆడిట్ నివేదిక వివరాలపై ప్రశ్నలు:
కంప్ట్రోలర్ అండ్ ఆడిటర్ జనరల్ (కాగ్‌) నివేదిక 7 జిల్లాల్లో రూ. 253.93 కోట్ల నష్టం అంచనా వేసింది. ఇది కేవలం ఒక పాక్షిక నివేదిక. మొత్తం 33 జిల్లాలకు ఆడిట్ చేసి ఉంటే, ఈ కుంభకోణం ఇంకా ముందే పూర్తి స్థాయిలో వెలుగులోకి వచ్చేది. ఆడిట్ అధికారులు ఎందుకు కేవలం కొన్ని జిల్లాలకు మాత్రమే పరిమితమయ్యారు? మిగిలిన జిల్లాలను ఆడిట్ చేయకుండా విస్మరించడానికి గల కారణాలేంటి? వారి పరిమితులపైనా, పనితీరుపైనా ఇప్పుడు తీవ్రమైన సందేహాలు వ్యక్తమవుతున్నాయి.

తప్పిదాలపైనా కఠిన చర్యలు అవసరం:
ప్రభుత్వ నిధుల రక్షణకు అత్యంత ముఖ్యమైన వ్యవస్థల్లో ఒకటైన ఆడిట్ వ్యవస్థ ఈ కుంభకోణంలో విఫలమైంది. ఇది కేవలం సాంకేతిక లోపం కాదు, విధి నిర్వహణలో తీవ్రమైన నిర్లక్ష్యం. ఈ కుంభకోణంలో ప్రత్యక్షంగా భాగమైన అధికారులపైనే కాకుండా, తమ బాధ్యతలను సక్రమంగా నిర్వర్తించడంలో విఫలమైన ఆడిట్ అధికారులపై కూడా ప్రభుత్వం కఠిన చర్యలు తీసుకోవాలి. లేకపోతే, ప్రజల పన్నుల డబ్బు దోపిడీకి గురవుతూనే ఉంటుంది. ఈ కుంభకోణం, ప్రభుత్వ పథకాలలో పర్యవేక్షణ, ఆడిట్ వ్యవస్థలను మరింత పటిష్టం చేయాల్సిన ఆవశ్యకతను స్పష్టం చేస్తుంది.

ఇప్ప‌టికైనా కాంగ్రెస్ స‌ర్కార్‌ ప్ర‌భుత్వ ప‌థ‌కాల‌ను అర్హులైన ల‌బ్దిదారుల‌కు చేకూర్చే విధంగా ప‌టిష్ట‌మైన చ‌ర్య‌లు చేప‌ట్టాల‌ని ప్ర‌జానీకం కోరుకుంటుంది..