- ఏబీవీపీ తెలంగాణ రాష్ట్ర కార్యవర్గ సభ్యుడు కార్తీక్
పేద, బడుగు బలహీన వర్గాల విద్యార్థులను విద్యకు దూరం చేయాలన్న దురుద్దేశంతో కాంగ్రెస్ ప్రభుత్వం పెండింగ్ లో ఉన్న రూ. 7500 కోట్ల స్కాలర్షిప్,ఫీజు రియంబర్స్మెంట్లను విడుదల చేయకుండా కుట్రలు చేస్తుందని ఏబీవీపీ తెలంగాణ రాష్ట్ర కార్యవర్గ సభ్యుడు కార్తీక్ విమర్శించారు. ఏబీవీపీ ఉప్పల్ శాఖ ఆధ్వర్యంలో పెండింగ్ లో ఉన్న ఫీజు రియంబర్స్మెంట్, స్కాలర్షిప్స్ విడుదల చేయాలని ధర్నా నిర్వహించారు. ఈ సంధర్బంగా కార్తీక్ మాట్లాడుతూ, రావుల రాజ్యం పోయి, రెడ్డిల రాజ్యం వచ్చింది కానీ విద్యార్థుల భవిష్యత్తు మాత్రం ఎక్కడవేసిన గొంగడిలా అక్కడే పడిందని వ్యాఖ్యనించారు. తెలంగాణలో కాంగ్రెస్ ప్రభుత్వం ఏర్పడి సంవత్సరం కావస్తున్న పెండింగ్ లో ఉన్న స్కాలర్షిప్,ఫీజు రియంబర్స్మెంట్లను విడుదల చేయడం లేదని మండిపడ్డారు.
ముఖ్యమంత్రి రేవంత్ రెడ్డి పేద విద్యార్థులకు ఎందుకు ఫీజు రియంబర్స్మెంట్, స్కాలర్షిప్లు విడుదల చేయలేదో సమాధానం చెప్పాలని డిమాండ్ చేశారు. గత ప్రభుత్వం లాగానే ఈ ప్రభుత్వం కూడా విద్యార్థి వ్యతిరేక విధానాలతో ముందుకు వెళ్తుందని, గత ప్రభుత్వాన్ని గద్దె దింపిన చరిత్ర ఏబీవీపీకి ఉందని అన్నారు. ఇప్పటికైనా పెండింగ్ లో ఉన్న స్కాలర్షిప్,ఫీజు రియంబర్స్మెంట్లను విడుదల చేయాలని, లేని పక్షంలో రాబోయే రోజుల్లో నిరసన కార్యక్రమాలు చేపట్టి, ప్రభుత్వానికి బుద్దిచెబుతామని హెచ్చరించారు.
