- ఓవర్‌లోడ్‌తో కిందకు దిగిపోయిన లిఫ్ట్‌
- లిఫ్ట్‌లో సిఎం తదితరులతో ఓవర్‌లోడ్‌
- ప్రమాదం తప్పడంతో ఊపిరి పీల్చుకున్న సిబ్బంది
తెలంగాణ ముఖ్యమంత్రి రేవంత్‌ రెడ్డికి తృటిలో ప్రమాదం తప్పింది. హైదరాబాద్‌ నోవాటెల్‌ హోటల్‌లో రేవంత్‌ రెడ్డి ఎక్కిన లిప్ట్‌ ఓవర్‌లోడ్‌ కారణంగా సాంకేతక సమస్య ఏర్పడింది. ఓవర్‌ వెయిట్‌తో ఉండాల్సిన ఎత్తు కంటే లిప్ట్‌ లోపలికి దిగిపోయింది. 8 మంది ఎక్కాల్సిన లిప్ట్‌లో 13 మంది ఎక్కడంతో లిప్ట్‌ మొరాయించింది. వెంటనే అప్రమత్తమైన అధికారులు, సెక్యూరిటీ సిబ్బంది లిప్ట్‌ను ఓపెన్‌ చేసి వేరే లిప్ట్‌లో సీఎంను కిందకు పంపించారు. దీంతో సీఎం రేవంత్‌ రెడ్డి సహా అధికారులు, సిబ్బంది ఆందోళన చెందారు. ఏం జరుగుతుందో అర్థంకాక కాసేపు అయోమయానికి గురయ్యారు. అనంతరం పెద్ద ప్రమాదం ఏమీ లేదని తెలుసుకుని లిప్ట్‌ నుంచి బయటకు వచ్చేశారు. అనంతరం మరో లిప్ట్‌లో ముఖ్యమంత్రిని అధికారులు తరలించారు. సీఎల్పీ సమావేశం సందర్భంగా హోటల్‌ వద్దకు సీఎం రేవంత్‌ రెడ్డి చేరుకున్నారు. తెలంగాణ ప్రభుత్వ విప్‌లు, కొంతమంది ఎమ్మెల్యేలు ముఖ్యమంత్రికి ఆహ్వానం పలికి హోటల్‌ లోపలికి తీసుకెళ్లారు. అయితే పైఅంతస్తుకు వెళ్లే క్రమంలో 8 మంది ఎక్కాల్సిన లిప్ట్‌లో రేవంత్‌ రెడ్డితోపాటు 13 మంది ఎక్కారు. దీంతో లిప్ట్‌ ఉండాల్సిన స్థానం కంటే కిందికి కుంగిపోయింది. వెంటనే అలారం మోగడంతో అధికారులు, హోటల్‌ సిబ్బంది అప్రమత్తం అయ్యారు. హుటాహుటిన లిప్ట్‌ వద్దకు పరుగులు పెట్టారు. అనంతరం సీఎం సహా అందరినీ లిప్ట్‌ నుంచి బయటకు తీసుకువచ్చారు. అనంతరం మరో లిప్ట్‌లో సమావేశం జరుగుతున్న సెకండ్‌ ప్లోర్‌కు తీసుకెళ్లారు. రేవంత్‌ రెడ్డి ప్రమాదం నుంచి తప్పించుకోవడంతో ఎమ్మెల్యేలు, అధికారులు, హోటల్‌ సిబ్బంది అంతా ఊపిరి పీల్చుకున్నారు. తెలంగాణ సీఎం రేవంత్‌ రెడ్డికి త్రుటిలో ప్రమాదం తప్పింది.
