- 243 కేజీల గంజాయిని స్వాధీనం చేసుకున్న బాలనగర్ ఎస్.ఓ.టీ పోలీసులు.
- ఒడిషా నుండి తెలంగాణ మీదుగా మహారాష్ట్రకు తరలిస్తున్న ముఠా..
- నలుగురిని అదుపులోకి తీసుకున్న పోలీసులు
శామీర్పేట్ ఓఆర్ఆర్ వద్ద భారీగా పొడి గంజాయి లభ్యమైంది.ఒడిశా నుండి తెలంగాణ మీదుగా మహారాష్ట్రకు పొడి గంజాయిని రవాణా చేస్తున్నారని సమాచారం రావడంతో సైబరాబాద్ బాలానగర్ ఎస్.ఓ.టీ బృందం,శామీర్పేట్ పోలీసులతో కలిసి ఓఆర్ఆర్ జంక్షన్ వద్ద తనిఖీలు నిర్వహించారు.ఈ క్రమంలో టీ.ఎస్.08 టీ 3206 గల బులెరో పికప్ వాహనాన్ని తనిఖీ చేయగా రూ.85,05,000 విలువ చేసే 243 కేజీల గంజాయి లభించింది.
గంజాయిని తరలిస్తున్న బజరంగ్ (23) ,గజేందర్ సింగ్ (26) ,నరేష్ కుమార్ చింగ్లా(40) ,కపిల్ శర్మ (28 ) లను పోలీసులు అదుపులోకి తీసుకున్నారు.వారి వద్ద నుండి రూ.70,000 విలువ చేసే 07 మొబైల్ ఫోన్లను,బులెరో వాహనాన్ని స్వాధీనం చేసుకున్నామని పోలీసులు తెలిపారు.మరో ఇద్దరు పరారీలో ఉన్నారని పెట్ బషీరాబాద్ లోని డీసీపీ కార్యాలయంలో ఏర్పాటు చేసిన మీడియా సమావేశంలో డీసీపీ కోటిరెడ్డి వెల్లడించారు.
