- హైదరాబాద్ సూపర్‌స్టార్స్ జట్టులో సహ యజమానులుగా రకుల్ ప్రీత్ సింగ్, జాకీ భగ్నాని
ప్రముఖ సినీ నటి రకుల్ ప్రీత్ సింగ్(Rakul Preet Singh), నటుడు జాకీ భగ్నాని కేఎల్ఓ స్పోర్ట్స్‌తో చేతులు కలిపారు. హైదరాబాద్ సూపర్‌స్టార్స్(superstars) జట్టులో సహ యజమానులుగా చేరారు. ఈ జట్టు ముంబైలో రేపు ప్రారంభం కానున్న ప్రపంచ పికిల్‌బాల్ లీగ్‌లో పాల్గొననుంది. ఈ సందర్భంగా సినీ నటి రకుల్ ప్రీత్ సింగ్ మాట్లాడుతూ పికిల్‌బాల్ ప్రపంచంలో వేగంగా అభివృద్ధి చెందుతున్న క్రీడగా ప్రాచుర్యం పొందిందన్నారు. ఇది అన్ని వయస్సుల వారిచే ఆడబడుతుందని పేర్కొన్నారు. హైదరాబాద్ సూపర్‌స్టార్స్ జట్టు ఈ క్రీడను మరింత ప్రోత్సహించి హైదరాబాద్‌తో పాటు దేశవ్యాప్తంగా ఆటగాళ్లను ప్రేరేపిస్తుందని తెలిపారు. ప్రపంచ పికిల్‌బాల్ లీగ్‌లో చేరడం నా క్రీడా ప్రస్థానంలో ఒక కొత్త అధ్యాయం అన్నారు. ఇది నాకు ఎంతో సంతోషాన్ని ఇస్తుందన్నారు. ఈ సందర్భంగా హైదరాబాద్ సూపర్‌స్టార్స్ సహ యజమాని జాకీ భగ్నానీ మాట్లాడుతూ వరల్డ్ పికిల్‌బాల్ లీగ్‌ను హైదరాబాద్ సూపర్‌స్టార్స్ కైవసం చేసుకోనుందని తెలిపారు. పికిల్‌బాల్ నిస్సందేహంగా తరతరాలుగా అత్యంత ప్రజాదరణ పొందిన క్రీడలలో ఒకటన్నారు. ఈ క్రీడను చేపట్టేందుకు మరింత మందిని ప్రేరేపించడానికి ఎదురు చూస్తున్నామని పేర్కొన్నారు.
ఈ సందర్భంగా కేఎల్ఓ స్పోర్ట్స్ సహ యజమాని శ్రీనాథ్ చిట్టూరి మాట్లాడుతూ హైదరాబాద్ సూపర్‌స్టార్స్ కుటుంబానికి రకుల్ ప్రీత్ సింగ్, జాకీ భగ్నానీని స్వాగతిస్తున్నామని చెప్పారు. వారి రాకతో అందరికి ప్రేరణ కలిగే అవకాశం ఉందన్నారు. మా పెట్టుబడితో ప్రతిభను ప్రోత్సహించి, క్రీడాకారులు, అభిమానుల సముదాయాన్ని బలంగా నిర్మించగలమని నమ్ముతున్నామన్నారు. మా లక్ష్యం కేవలం పోటీ పటిమ కలిగిన జట్టును రూపొందించడం మాత్రమే కాదని, క్రీడను ఆస్వాదించేందుకు అందరూ కలిసి పాల్గొనే వాతావరణాన్ని నిర్మించడమని తెలిపారు. ఈ సందర్భంగా కేఎల్ఓ స్పోర్ట్స్ సహ యజమాని సంజయ్ జుపూడి మాట్లాడుతూ కేఎల్ఓ స్పోర్ట్స్ తరపున రకుల్ ప్రీత్ సింగ్, జాకీ భగ్నానీతో కలిసి పికిల్‌బాల్ ఉత్సాహభరిత ప్రపంచంలోకి ఈ ప్రయాణాన్ని ప్రారంభించడం చాలా ఆనందంగా ఉందన్నారు. వరల్డ్ పికిల్‌బాల్ లీగ్ ప్రాచుర్యాన్ని పెంచేందుకు ఇది ఎంతగానో ఉపకరించనుందని తెలిపారు. హైదరాబాద్ అనేది జ్ఞాపకాలతో నిండిన క్రీడా సాంస్కృతిక నగరం అన్నారు. ఈ లీగ్‌తో ఈ నగరానికి ప్రాతినిధ్యం వహించడం గౌరవంగా భావిస్తున్నామని తెలిపారు.
హైదరాబాద్ సూపర్‌స్టార్స్‌కు ప్రముఖ కోచ్ జానీ ఆండ్రూస్ నేతృత్వం వహించనున్నారు. ‘జానీ పికిల్‌బాల్’గా ప్రాచుర్యం పొందిన జానీ 2016 నుంచి పికిల్‌బాల్ క్రీడలో విశేష అనుభవాన్ని కలిగి ఉన్నారు. ఆయన భారత పికిల్‌బాల్ స్టార్ కుల్దీప్ మహాజన్‌తో పాటు అంతర్జాతీయ స్థాయి స్టార్స్ మ్యాక్స్ ఫ్రీమాన్, అవా కావటాయో, రాస్ విటాకర్, మడలినా గ్రిగోరియు, కారోలినా ఒవ్జారెక్, బెన్ కాస్టన్, లూడోవికా షియాకీ తదితర ఆటగాళ్ళకు శిక్షణ ఇవ్వనున్నారు. కేఎల్ఓ స్పోర్ట్స్, క్రీడలపై ఆసక్తి కలిగిన సంజయ్ జుపూడి, శ్రీనాథ్ చిట్టూరి ఆధ్వర్యంలో వరల్డ్ పికిల్‌బాల్ లీగ్ కోసం ‘హైదరాబాద్ సూపర్‌స్టార్స్’ పేరుతో ఉన్న హైదరాబాద్ ఫ్రాంచైజీని కొనుగోలు చేశారు. భారతదేశపు మొట్టమొదటి గ్లోబల్ ఫ్రాంచైజ్ ఆధారిత పికిల్‌బాల్ లీగ్ అయిన డబ్ల్యూపీబీఎల్‌ను మునుపటి టెన్నిస్ క్రీడాకారులు గౌరవ్ నాటేకర్, ఆరతి పొన్నప్ప నాటేకర్ స్థాపించారు.
ఫైనల్ ఫిక్చర్స్:
2025 జనవరి 25: హైదరాబాద్ సూపర్‌స్టార్స్ – బెంగుళూరు జవాన్స్
2025 జనవరి 26: హైదరాబాద్ సూపర్‌స్టార్స్ – పుణే యూనైటెడ్
2025 జనవరి 27: హైదరాబాద్ సూపర్‌స్టార్స్ – ముంబై పికిల్ పవర్
2025 జనవరి 29: హైదరాబాద్ సూపర్‌స్టార్స్ – ఢిల్లీ దిల్‌వాలే
2025 జనవరి 31: హైదరాబాద్ సూపర్‌స్టార్స్ – చెన్నై సూపర్‌చాంప్స్
