ఏ దేశం అయినా సమాజం యొక్క శ్రేయస్సును, పురోగతిని అభివృద్ధి చేసే ప్రధాన రంగాలు రెండు ఉంటాయి, అవి విద్య మరియు వైద్యం. ఈ రెండు రంగాలు లేకుండా ఏ సమాజమైనా అభివృద్ధి దిశలో ముందుకు సాగలేదనడం అక్షరసత్యం. విద్య ద్వారా వ్యక్తులు జీవితంలో స్ఫూర్తి పొందుతారు, సమాజానికి ఆర్థికంగా, సామాజికంగా సహకరించడానికి సిద్ధమవుతారు.వైద్యం ద్వారా ఆరోగ్యంగా ఉన్న ప్రజలు తమ శక్తిని, సమయాన్ని పూర్తిగా ఉపయోగించి దేశ అభివృద్ధిలో భాగస్వాములు అవుతారు. అందుకే ఏ ప్రభుత్వమైనా ఈ రెండు రంగాల మీద ప్రత్యేక దృష్టి పెట్టడం అత్యవసరం.విద్య అనేది సమాజాన్ని మార్పు వైపుకు తీసుకెళ్లే శక్తివంతమైన సాధనం.ఇది కేవలం పుస్తకాల పరిధిలోనే పరిమితమైనది కాదు; ఇది జీవన విధానం,ఆలోచనా విధానం,మరియు వైఖరి ను కూడా నిర్దేశిస్తుంది. విద్య ఉన్న వ్యక్తులు తమ సామాజిక బాధ్యతను సరిగ్గా అర్థం చేసుకుంటారు, ఇతరులను ప్రభావితం చేస్తారు.ఒక సామాజికవేత్తగా మారి దేశాభివృద్ధికి ప్రోత్సాహకంగా నిలుస్తారు.ప్రభుత్వం ఉచిత మరియు తప్పనిసరి విద్య ను అందజేయడమే కాకుండా,నాణ్యమైన పాఠశాలలు, సమర్థ ఉపాధ్యాయులు, ఉత్తమ శ్రేణి సాంకేతికత వంటి అంశాల మీద దృష్టి పెట్టాలి.ఆధునిక సాంకేతికతతో కూడిన విద్య మాత్రమే విద్యార్థులను ప్రస్తుత సమాజ పోటీకి సిద్ధం చేస్తుంది.డిజిటల్ సాంకేతికత ద్వారా విద్యను అన్ని ప్రాంతాలకు విస్తరించడం,మారుమూల గ్రామాలలో కూడా విద్యకు ప్రాప్యత కల్పించడం ప్రభుత్వ బాధ్యతగా మారింది.ఉన్నత విద్య కు కూడా ప్రాధాన్యం ఇవ్వాలి.సాంకేతిక విద్యలో ప్రతిభావంతులు తయారవ్వడం వలన దేశానికి అవసరమైన ఇంజినీర్లు,డాక్టర్లు,శాస్త్రవేత్తలు మరియు పనిచేసే శ్రామికులు సమకూరతారు. వారు చేసే కృషి దేశాన్ని సాంకేతికంగా మరియు ఆర్థికంగా అభివృద్ధి దిశగా నడిపిస్తుంది.ముఖ్యంగా ఉచిత విద్యా పథకాలు, విద్యార్థుల రుణాలు, స్కాలర్షిప్‌లు వంటి ప్రభుత్వ చర్యలు విద్యకు అందరికి అందుబాటులో ఉంచే మార్గాలుగా నిలుస్తాయి.పేదవారికి,మారుమూల ప్రాంతాల వారికి విద్యకు సంబంధించిన అవకాశాలు తక్కువగా ఉన్నప్పుడు, వారిని ప్రధాన అభివృద్ధి స్రవంతిలోకి తీసుకురావడం చాలా కష్టమవుతుంది.అందువల్ల,పాఠశాల మౌలిక సదుపాయాలు,పోషకాహార కార్యక్రమాలు,ఉచిత పుస్తకాలు,విద్యా పరికరాలు వంటి పథకాలను ప్రభుత్వం ప్రవేశపెట్టడం వలన పేద విద్యార్థులకు కూడా నాణ్యమైన విద్య అందించబడుతుంది.ప్రభుత్వం విద్యా వ్యవస్థలో లింగ సమానత్వం కోసం పని చేయాలి. మహిళా విద్యకు ప్రత్యేక చర్యలు తీసుకుంటే, వారు కుటుంబాలకు మాత్రమే కాదు,సమాజానికి కూడా ఆర్థికంగా మరియు సామాజికంగా తోడ్పాటును అందిస్తారు. మహిళలు చదువుకుంటే,వారి పిల్లలకు కూడా విద్యా సౌకర్యాలు మెరుగ్గా ఉంటాయి,ఇది తరతరాలుగా సమాజ పురోగతికి దోహదం చేస్తుంది.ఆరోగ్యకరమైన సమాజం లేకుండా దేశ అభివృద్ధి సాధ్యం కాదు. ఆరోగ్య సంరక్షణ లో ప్రభుత్వ ప్రాధాన్యత అత్యంత కీలకమైనది, ఎందుకంటే ప్రజల ఆరోగ్యం బలహీనపడితే, వారి ఉత్పాదకత,ఆర్థిక స్థితి అలాగే సామాజిక శ్రేయస్సు ప్రభావితమవుతాయి. అందుకే ప్రాథమిక ఆరోగ్య కేంద్రాలు, ప్రభుత్వ ఆసుపత్రులు అనేవి అందరికీ చేరువ కావాలి.గ్రామీణ ప్రాంతాలు మరియు మారుమూల ప్రాంతాలలో కూడా వైద్య సేవలు అందుబాటులోకి రావాలి.అక్కడ వైద్యుల కొరతను దృష్టిలో ఉంచుకుని, సాంకేతిక ఆధారిత వైద్య సేవలు,టెలీమెడిసిన్ వంటి పథకాలు ప్రవేశపెట్టాలి.దీని వలన గ్రామీణ ప్రజలు కూడా తక్షణ వైద్య సహాయం పొందగలుగుతారు.అలాగే,ఆరోగ్య బీమా పథకాలు, రోగ నిరోధక కార్యక్రమాలు,పౌష్టికాహారం కార్యక్రమాలు ప్రజల ఆరోగ్యాన్ని మెరుగుపరచడంలో ముఖ్య పాత్ర పోషిస్తాయి.
ప్రజలు ఆరోగ్యం పట్ల స్వచ్ఛంద బాధ్యత తీసుకోవడం ఎంత ముఖ్యమో ప్రభుత్వం కూడా అవగాహన కల్పించడంలో ముందుండాలి. ప్రజలలో ఆహారపు అలవాట్లు, వ్యాయామం, శుభ్రత వంటి అంశాలపై అవగాహన పెంపొందించడం ద్వారా రోగ నిరోధక శక్తి పెరుగుతుంది.ప్రభుత్వ కార్యక్రమాలు తనరీతినే మార్గదర్శకాలు కాదు, ప్రజలకు ఆరోగ్య విధానం గురించి అవగాహన కల్పించడంలో పెద్ద పాత్రను పోషించాలి.
ఆరోగ్యంగా ఉన్న ప్రజలు అధిక ఉత్పాదకత కనబరుస్తారు. ఒక ఆరోగ్యకర దేశం సాంకేతికంగా అభివృద్ధి చెందడం సాధ్యం. ఆరోగ్య సేవలు అందరికీ సమానంగా ఉండడం వలన సమాజంలో ఉన్న ఆర్థిక అసమానతలు తగ్గుతాయి. పేదవారికి అందుబాటులో ఉన్న వైద్య సేవలు అందించడం వలన వారి కుటుంబాలు ఆర్థిక భారం నుంచి విముక్తి పొందుతాయి. దీని వలన ఆర్థికంగా దేశం పురోగతిలో ముందుకు సాగుతుంది.
ప్రభుత్వం విద్య మరియు వైద్యరంగాలలో సరైన చర్యలు తీసుకుంటే, అది దేశానికి శాశ్వత శ్రేయస్సును అందిస్తుంది.ఏ ప్రభుత్వమైనా విద్యా, వైద్య రంగాలకు ప్రాధాన్యత ఇవ్వడం వలన సమాజం సాధికారతతో అభివృద్ధి పథంలోకి పయనిస్తుంది.
డా: చిట్యాల రవీందర్
7798891795
