పెండింగ్ ప‌నులు వెంట‌నే పూర్తి చేయాలి

• జిడ‌బ్ల్యూఎంసీ అధికారులతో ఎమ్మెల్యే కడియం శ్రీహరి సమీక్షా సమావేశం

గ్రేటర్ వరంగల్ పరిధిలోని 46వ డివిజన్ లోని రాంపూర్, 64 వ డివిజన్ లోని ఉనికిచర్ల గ్రామాలలో పెండింగ్ సిసి రోడ్లు, సైడ్ డ్రైనేజీల నిర్మాణాలను వెంటనే పూర్తి చేయాలని మాజీ ఉప ముఖ్యమంత్రి, స్టేషన్ ఘనపూర్ ఎమ్మెల్యే కడియం శ్రీహరి(Kadiyam Srihari) అధికారులను ఆదేశించారు. శుక్ర‌వారం హన్మకొండ కనకదుర్గ కాలనీలోని ఎమ్మెల్యే నివాసంలో బల్దియా అధికారులు, రాంపూర్, ఉనికిచర్ల గ్రామాల ముఖ్య నాయకులతో ఎమ్మెల్యే కడియం శ్రీహరి సమీక్షా సమావేశం నిర్వహించారు. రాంపూర్, ఉనికిచర్ల గ్రామాలలో సిసి రోడ్లు, సైడ్ డ్రైనేజీలు, త్రాగు నీరు, పెన్షన్లు, స్మశాన వాటికల సమస్యలపై అధికారులు, నాయకులతో చర్చించారు. గ్రేటర్ వరంగల్ 64వ డివిజన్ ఉనికిచర్ల గ్రామంలో పెన్షన్ దారుల సమస్యను వేంటనే పరిష్కరించాలని సంబంధిత అధికారులను ఆదేశించారు. వృద్దులు, వికలాంగులు, మహిళలు ఉనికిచర్ల నుండి కరుణాపురం వెళ్లి పెన్షన్ తీసుకోవడానికి ఇబ్బందులు పడుతున్నారని కావున ఉనికిచర్ల గ్రామంలో పెన్షన్ ఇవ్వాలని సూచించారు. అలాగే గ్రామంలో మంజూరు అయిన సిసి రోడ్లు, సైడ్ డ్రైనేజిల నిర్మాణం వెంటనే పూర్తి చేయాలని అన్నారు. అదనంగా 30లక్షలతో సిసి రోడ్డు, సైడ్ డ్రైన్ నిర్మాణాలకు ప్రతిపాదనలు సిద్ధం చేయాలని అన్నారు. గ్రామంలో త్రాగునీటి సమస్య ఉందని కావున వాటర్ ట్యాంక్ నిర్మాణానికి సైతం ప్రతిపాదనలు సిద్ధం చేయాలి సూచించారు. మరియు ఔటర్ రింగ్ రోడ్డు నుండి ఉనికిచర్ల మెయిన్ రోడ్డును డబుల్ రోడ్డు చేసి సెంట్రల్ లైటింగ్ ఏర్పాటు చేయాలని పేర్కొన్నారు.

46వ డివిజన్ రాంపూర్ లో మాడల్ స్మశాన వాటిక నిర్మాణానికి ప్రతిపాదనలు సిద్ధం చేయాలని అధికారులను ఆదేశించారు. అలాగే గ్రామంలో ప్రాథమిక ఆరోగ్య కేంద్రం నిర్మాణానికి స్థలాన్ని గుర్తించాలని గ్రామస్తులకు సూచించారు. రాంపూర్ లో త్రాగు నీటి సమస్యలు రాకుండా అంతర్గత పైప్ లైన్ నిర్మాణాలను పూర్తి చెయాలనీ అలాగే గ్రామంలో లైన్ మెన్ పని తీరు సరిగా లేదని వెంటనే లైన్ మెన్ ను మార్చాలని అధికారులకు సూచించారు. గ్రామంలో సిసి రోడ్లు, సైడ్ డ్రైన్ ల నిర్మాణాలను వీలైనంత తొందరగా పూర్తి చేయాలని అన్నారు.

ఈ కార్యక్రమంలో జిడ‌బ్ల్యూఎంసీ ఈఈ సంతోష్, కాజీపేట జోన్ డిప్యూటీ కమిషనర్ రవీందర్, ఉనికిచర్ల గ్రామం నుండి మహేందర్, స్వామి, రాజేందర్, బాబు, మధుపాల్ రెడ్డి, రాంపూర్ గ్రామం నుండి హనుమంతరావు, బిక్షపతి, రాజు, ప్రదీప్, దేవేందర్ రావు, ప్రభాకర్, రాజేష్, శ్రీకాంత్, అశోక్ తదితరులు పాల్గొన్నారు.